للكاتبه نورهان أحمد فتحى
بمناسبه عيد الاضحى حبيت احكي موقف حصل زمان مع واحد جارنا جدي حكالي عليه و أنا عندي ١٧ سنه اعرفكم بنفسي أنا ياسر عندي ٢١سنه حاليا طالب في حاسبات و معلومات من محافظة …….. المهم يعني في يوم كنت قاعد مع جدي في الدكان(محل) كان زي السوبر ماركت كدة بس زايد عليه كمان علف الحيوانات و الطيور و أثناء ما كنا بنتكلم مر علينا راجل و سلم علي جدي و مشي شكله كان كبير في السن وشعره ابيض و أنا أول مرة أشوفه فسألت
ياسر: مين الراجل ده يا جدي أول مرة أشوفه بس حاسس انه مش غريب عليا
جد ياسر : انت مش عارف مين ده ؟
ياسر : لا هو أنا اعرفه ؟
جد ياسر : ده عثمان الجزار
ياسر : عثمان إزاي يا جدي بس ده الراجل ده شكله كبير اوي
جد ياسر : اه ماهو كبر من إللي حصله في الكام شهر اللي فاته
ياسر : حصله ايه يا جدي يخلي شكله عامل كدة
جد ياسر : أنا هحكيلك .. من فترة كبيرة كدة جه راجل باين عليه الغني راكب عربية اخر ولابس ساعه دهب و حاجة اخر ابهه
ياسر : وانت عرفت منين ياجدي إنها ساعه دهب كان كاتب عليها يعني !
جد ياسر : لو قاطعتني تاني هحميك بكوبايه الشاي اللي قدامي دي عاوز تسمع قصه الراجل و لا هتعد تقاطعني
ياسر بضحك : خلاص .. خلاص هسمع
جد ياسر : المهم يا لمض كان راجل باين عليه الغني أنا حسيت اني اعرفه ولما قرب علينا هنا كنت عرفت انا شوفته فين ده كان واحد من إللي مرشحين نفسهم للانتخابات و صوره مغرقه البلد كلها
ياسر : طيب و ايه يعني ماينزل هنا عادي مش دايرته اللي عاوز الناس تنتخبه فيها ايه المشكله
جد ياسر : يا بني اسمع الاول اللي حصل
ياسر : حاضر
جد ياسر : الراجل ده بالاخص مينفعش حد ينساه أنا استغربت أن ليه وش ينزل هنا تاني
ياسر : ليه ياجدي ؟
جد ياسر : لأن بنت خالتك جملات اللي في الشارع اللي ورانا رقيه عارفها !
ياسر : لا ماخدش بالي مالها ؟
جد ياسر : رقيه دي بت بميت راجل نزلت فضحته في كل حته سجلتله صوت وصورة و هو بيستدرج البنات الصغيرة عشان يغت.صبهم أو يعمل معاهم علاقات وهي عرفت بالصدفه من بنت في المنطقه هنا كانت بتديلها درس لما راحتله وواجهته كانت بتصوره فيديو بالموبايل و كان بيتكلم بطريقة قذ.رة و اخر قله ادب و حاول يع.تدي عليها هي كمان بس هي ضربته و هربت و لأن محدش كان هيصدقها لو قالت لالأهل البلد أن اللي بيأكلكم ويشربكم بيعمل كدة روحت من عنده و نشرت الفيديو و وزعته في البلد كلها
ياسر : و اهل البلد عملوا ايه
جد ياسر : كنا كل ما ينزل يابني تمنعه من النزول بس للاسف كانت بتقف قدامه هي و تلاته اربعه بس بقيت البلد كانوا خايفين منه ومن نفوذه لدرجة أنهم منعوها تبلغ وهددوها وقالو أنهم بكدة يبقوا بيفض.حوا بناتهم وعرضهم
ياسر : ايه الجهل ده يا جدي
جد ياسر : اهو ده اللي كانوا بيقولوه بس بدأت الناس متحترموش ولا تحترم كلمته و مرديوش ينتخبوه و بقي مفضوح في كل حته بدرجة أن الفيديو اتسرب الجرائد وبدأت الجرائد تتكلم و بقي يرضي ناس عشان تتكلم حلو عنه و يقوله إنها كدابه و هي اللي رمت نفسها عليه و حبت تشوه سمعته
ياسر : برده يا جدي مش فاهم ايه علاقه ده كله بالجزار
جد ياسر : ما دي المصيبه اللي اتسببت في معرفه الراجل ده بعثمان الراجل ده راح للدجال اللي في البلد اللي جنبنا بركات الز..فت و قاله إنه عاوز يعمل للبت دي عمل يخليها تم.وت وهي عائشه كدة احنا مكناش نعرف إحنا اتفاجئنا بيه نازل يسأل الجزارين اللي في المنطقه عن قراشيه اللوح أو عظمه اللوح و العاصمه دي يابني معروفه أنها عشان كبيرة و تاخد مساحه كبير بيكتبوا عليا السحر و الاعمال ربنا يكفينا الشر المهم الناس الجزارين قالوله طلبك مش عندنا ومنهم واحد جري وراه بالساطور عثمان بقي مكنش يعرف اي حاجة من دي كان مسافر لأخته و كان لسه راجع ومحدش حكاله حاجة عن اللي حصل عشان منغموش اول ما يرجع كدة هو لاقي واحد بيرن عليه وبيقوله أنا قصدك في معروف أنا عاوز عجل بمواصفات معينه كدة و قاله المواصفات وعاوزك تدبحهولي بس .. استغرب عثمان و قاله بس أنا معنديش دكان جزارة ولا حاجة أنا بدبح أضاحي بس في العيد في المكان اللي بيتقالي عليه رد قاله مانا عاوزك تدبحه عندي هنا في البيت و اداله العنوان عثمان لما رجع كان مستغرب وعلامات الذهول علي وشه و جه قعد جنبي وقالي أنه الراجل بتاع الانتخابات ده خده من المكان اللي اتفقه عليه للبلد اللي جنبهم بالعربيه ولاقتني في بيت ريحه مقبض كدة المهم اتفق معايا اخد كام و ادبح و اشفي و ماخدش معايا اي حاجة ولا حتي الجلد ولا اي حاجة بشرط أنه هيديني مبلغ محترم بصراحه كان اربع اضعافي اللي باخده ووافقت وعملت كل اللي اطلب مني بالظبط لاقتني بقوله و كسرت عضمه اللوح يابني بصلي بزهول كدة و سكت شويه و قالي لا ده راجل دابح عشان يعمل خير و يفرق ع الناس لحمه هيكون عاوز شر بقيت أقوله يا خراب بيتك يا عثمان الفلوس زغللتك ونسيت و شاركت في كارثه و حكيتله كل اللي حصل رد عليا بتردد و قال هو لسه في حد بيصدق التخاريف دي أنا قائم ارتاح شويه هو عشان المكان كان غريب و مقبض والراجل طلب مني حاجات معينه يبقي سحر ما يمكن عاوز الهضم عشان عنده كلاب بدأ يبرر تبريرات خايبه و قام مشي مكملناش اسبوع يابني و لاقينا رقيه اللي كانت ورد دبلت و بقت تصرخ و تش.تم و تس.ب و تقول كلام مش حلو و تفضح كل الناس و تنزل تنكش شعرها و تخلع هدومها في الشارع و الناس تجري تشترها كل ما يجي شيخ مايقدرش عليها حالتها بقت تسوء خست وشعرها وقع و الدكاترة كانوا بيدوها علاج ومش لاقيين اسباب للي بيحصل غير أنها اتجنت و جه شيخ حاول يطلع الجن منها في يوم و قرأ عليها و كان ليقرر الجلسات و قالوا إن الجن طلع بس هي ماتت بعد ما الشيخ ده جه ب٣ ايام عمرها يابني محدش هينوبه حاجة ربنا مش كاتبهاله
بس الغريب بقي إن بعد موتها عثمان بدأ يحصله حاجات غريبه وبقي يمشي يصرخ في الشارع و بقي يقولها ابعدي عني ابعدي عني مكنتش اعرف والله ماكنت اعرف و بدأ يقول اسماء غريبه و كان كأنه بيحارب حد في الشارع شويه ولاقيناه عنده حروق في جسمه نسأله يقول ده منهم هما اللي بيعمله فيا كدة يبقي واقف معانا بيضحك نلاقيه فجأة وقع في الأرض وحاله تشنجات و البلد كلها بقت في حاله هياج البلد اتلبست ولا ايه وطبعا جابوله شيخ وقرا عليه بس في مرة اخدوه الجامع و الشيخ اللي في الجامع قرأ عليه قرآن لحد لما هدي و قاله احكيلي علي حصلك و هل بتشوف رؤيه أو احلام غريبه لما فاق حكاله أن ده بيحصل معاه من بعد مو.ت رقيه و إنه بيشوف نفسه بيد.بح العجل وفيه ظلال كتير أوي حواليه و بيشوف واحد بيحط قماش في د.م العجل ويكتب علي القماش و بيكتب علي جلد ارنب بد.م العجل مش بس كدة ده في في حلم تاني شافه بيكتب رموز بالدم و بيدخلها في قلب العجل و ليدفن القلب ده في المقابر و عضمة اللوح و الكارع بيتكتب عليهم طلاسم و بيحطهم بردو في المقابر و فيه اربع اشخاص منهم رقيه بيجوا و بيحاولوا يموتوه في الحلم و بيقولوله انت السبب ياتقول الحقيقه يا تمو.ت طبعا ناس كتير من المنطقه كانوا مع الراجل في الجامع و الكل صدق اللي حصل و مابين يدعوا عليه ولا الراجل الغني و الدجال وبين الحسبنه الغريب بقي إننا تاني يوم وصلنا خبر أن فيلا الراجل اللي كلمه عشان الاضحيه ده و.لعت بالكامل لدرجة أنها بقت رماد و هو جواها و الدجال محدش يعرف عنه حاجة أما عثمان شعرة ابيض و بيقول أنه كان هناك ساعه الحر.يق إنه حلم إنه كان هناك و إنه شاف ناس كتير أوي هناك الأربع أشخاص اللي منهم رقيه و ظلال كتير كانوا بيولعوا في الفيلا و رقيه والاربع الأشخاص كتفوا الراجل ده لحد ماوقع عليه السقف من وهل اللي شافه شعره ابيض في الحلم و بؤه اتعوج وقاام من الحلم لاقي نفسه علي نفس الهيئه و الحاله و بدأ يواظب ع الصلاة و القران و بقي من ضمن اللي بيعالجوا كمان و في حياته مابقاش ينسي يكسر عظمه و بقي يكسر العضم ميت حته و مش بس كدة ده راح مع اكتر من الشيخ و جاب الأعمال اللي كان بيشوفها في الحلم وفكوها ومن ساعتها و هو كدة بؤه رجع تتعدل شويه إنما شعره فضل ابيض و بقينا نقوله يا شيخ عثمان
ياسر : كل ده حصل في ٣ شهور
جد ياسر : ربك لما يريد يغير الحال بمجرد رمشه عين
الدجال هو اللي اقترح ع الراجل أنه يشتري عجل و يتصرف فيه لأن محدش هيرضي إنه يديله طلبه و اهو يوزع لحمته ع الناس عشان يبان إنه راجل طيب وبيعمل خير الدجال يابني شيطان من الانس ع الارض ربنا يكفيك شرهم .
